La rispueste de Cei a 141 comuns de Comunitât linguistiche furlane

da Alessandro Di Giusto

Il gardenâl Matteo Zuppi, president de Conference Episcopâl Taliane, al à rispuindût ai 141 Comuns aderents a la Assemblee de comunitât linguistiche furlane, che intai dîs passâts e veve pandût intune letare mandade juste ae Cei la contrarietât par la mancjade aprovazion dal Messâl in marilenghe. Une rispueste, chê dai vescui talians, ch’e lasse la puarte vierte in avignî par rivalutazions dal câs. Intant la Aclif e domandarà ai Comuns furlanofons di aprovâ une delibare di poie a la cause intai singui Conseis comunâi.

“Zentîi Siôrs, intant graziis da la vuestre letare – si lei intal document inviât dai vescui – e da lis tantis e impuartantis considerazions che mi fasês rivâ. Il vescul Mazzocato (arcivescul di Udin, ndr), inte Conference episcopâl fate a Assisi intai ultins dîs, lis à rapresentadis cuntune vore di passion e di competence. O cirarìn di studiâ la vuestre domande e di cjatâ une strade par une soluzion ai vuestris sburts. Us ringrazii e o continuarìn a restâ in contat par che la strade aromai vierte za agns dal simpri cjâr Bonsignor Battisti (puar arcivescul di Udin mancjât intal 2012, ndr) no sedi bandonade”.

“O ringraziìn – al à dit Daniele Sergon, president de Aclif e sindic di Caprive – il gardenâl Zuppi par la rispueste, segn di cemût che dentri da la Glesie catoliche taliane e je dut câs une atenzion vivarose par la cuestion tant da la lenghe furlane che di chês altris lenghis minoritariis. O ricuardìn difat che inte votazion fate a Assisi la plui part dai vescui e veve aprovât il Messâl in marilenghe, ma il regolament de Cei al previôt la maiorance cualificade e no chê semplice par chestis cuestions liturgjichis. In chest sens o crodìn ch’al sedi fondamentâl pai Comuns furlanofons esprimisi cuntune delibare dai lôr Conseis comunâi, come ch’al à za fat il Comun di Udin: une maniere par fâ sintî ancjemò di plui la nestre vôs di fedêi furlans, adun cun chês altris istituzions, Regjon prin di dut e ents e associazions furlanistis”. (a.d.g.) – 29.11.2023

Lasse un coment

Redazion

logo

Editoriale Il Friuli Srl
P.IVA 01907840308

Regjistrazion al Tribunâl di Udin n. 9

dai 6 di Lui dal 2022

PRIN PLAN

Chest sît al dopre i cookies par miorâ la tô esperience di navigazion. Lant indevant tu acetis la nestre informative su la privacy. Acetâ Lei di plui