La poesie jessude des cjasis di polse

In ocasion de Zornade internazionâl de lenghe mari, a S. Pieri dai Sclavons al è stât presentât un libri nassût di un progjet selezionât par GO!2025 in graciis di un bant Interreg, che a veve tal centri la poesie. “La poesie dei dialetti e il paeaggio delle immagini”, par sloven Poezija narečij in pokrajina podob (e par furlan La poesie dai dialets e il paisaç des imagjinis) al à al centri propit lis lirichis di autôrs dal Nûfcent e contemporanis, de nestre regjon e de Slovenie. I tescj a son stâts voltâts par furlan e tai dialets fevelâts dai ospits di cinc cjasis di polse de zone di confin: S. Pieri, Mortean, Cjaudistrie, Tulmin e Gradišče nad Prvačino. I tescj a fevelin di paisaç e de relazion che al à vût cui autôrs e a son stâts ancje la senegjature par une schirie di curtmetraçs metûts dongje di cinc students di cuatri scuelis di Gurize, Tolmin e Cjaudistrie. A inmaneâ e ideâ il progjet, la associazion Stazioni_Postaje di Topolò, che e à curât lis traduzions, e Zavod Otok di Isule di Istrie par chel che al rivuarde soredut la part cinematografiche coordenade di Lorena Pavlič. (A.I.) – 24.02.2026