Doi dîs par memoreâ i cincuante agns de muart di Pier Paolo Pasolini, copât te gnot dal prin ai 2 di Novembar a Ostia, dongje di Rome. A Cjasarse, là che il poete al passave lis feriis e po dopo al à vivût dal ’42 al ’50, a son stadis inmaneadis dôs zornadis di incuintris e celebrazions de bande dal Centri studi “Pier Paolo Pasolini”, un lûc che al è un pont di riferiment internazionâl. Propit te sede di cjase Colussi si fasaran doi dîs di cunvignis cu la “Pasolini High School” par students talians e slovens, intant che tal teatri che al à il so non si daran adun studiôs, students, esperts di cine e leterature. Lis cerimoniis par memoreâ Pasolini si vierzaran domenie ai 2 tal cimitieri di Cjasarse, là che e je la sô tombe, dongje de mari Susanna. Alì a saran lis istituzions locâls e i rapresentants dai comuns di Rome e di Bologne, lis altris citâts talianis leadis a Pasolini. Il dì dopo, la lezion di sieradure par cure dal cjantautôr Roberto Vecchioni, il “professôr” de musiche taliane. (A.I.) – 01.11.2025
Foto archivi Garofalo
