La medisine e spieghe la art

Nissun al sa pardabon ce che al è daûr dai voi de “Monna Lisa”, la “Gioconda” piturade di Leonardo. E se chê muse, lete e interpretade dome pal risultât artistic, e podarès dâ cualchi indicazion su cemût che la fantate e steve pardabon: ben o mal? E somee fantasience, e invezit si clame iconodiagnostiche, une dissipline che e dopre la cognossince de medisine di vuê al studi des oparis di art dal pasât par ricognossi segnâi clinics e i sintoms dai personaçs piturâts. In cheste maniere, cualchi robe un tic strambe che i critics no rivavin a spiegâ e pues jessi analizade de sience. “Arte e genetica”, art e gjenetiche al è il titul di une gnove rassegne inmaneade de Universitât di Triest dai 3 ai 10 di Fevrâr, puartant ancje ator pe regjon cualchi apontament che al è une sfide cuintri lis categoriis tradizionâls de divulgazion sientifiche. A Triest, par esempli, si cirarà di analizâ cuant che il mâl al devente art e soredut di interpretâ la art doprant la gjenetiche. Di Mugle a Pordenon, di Udin a Palme, invezit, a saran proponûts in ogni tape doi apontaments, un laboratori artistic e un sientific, cul jutori di sienziâts, ma ancje di atôrs, intun viaç che al passe de storie de art a chel de medisine e il contrari. (A.I.) – 03.02.2026