La famee Pasolini contade de mari

Une vôs che e je restade cidine par agnorums e torne a contâ une storie che e je une sorprese. La vôs e je chê di Susanna Colussi, la mari di Pier Paolo Pasolini, che e à scrit 21 cuaders par contâ lis esperiencis de sô famee, par sigûr cence mai imagjinâsi che chês pagjinis, cetancj agns dopo, a saressin deventadis un libri che al varès dât un voli unic e gnûf su lis lidrîs dal scritôr. Cheste testemoneance straordenarie e je al centri de conference leterarie “Susanna Colussi Pasolini. Romanç di famee”, programade par joibe ai 25 aes 6 di dopomisdì tal Antîc Mulin di S. Zuan di Cjasarse. La conference e fâs part dal program estîf “In un colore eterno d’estate” (Intun colôr estîf eterni), promovût dal Centri studis “Pier Paolo Pasolini”. La conference e je inspirade propit ae publicazion dal “Romanzo di famiglia” (Ponte alle Grazie, 2026), il libri jessût postum di Susanne Colussi, curât de sô gnece Grazia Chiarcossi. Piero Colussi e Maura Locantore a fasaran la conversazion, vuidâts di Valentine Gasparet, intant che Caterina Comingio e proponarà cualchi leture seniche dal libri. (A.I.) – 23.06.2026