La etiche dal viandant daûr dal filosof Galimberti

Filosof, sagjist, gjornalist e psicoanalist, Umberto Galimberti al rive martars ai 2 tal Teatri gnûf “Giovanni da Udine” (il dì prime de date programade) cun “L’etica del viandante” (La etiche dal viandant), un incuintri dedicât al so libri cul stes titul. Daûr di Galimberti, la uniche etiche pussibile al dì di vuê e je chê dal viandant che, a diference dal viazadôr, nol à une mete. La etiche dal viandant si opon a chê antropologjiche dal domini de Tiere, e denunzie il nestri model di civiltât e e met in evidence che la sô difusion in dut il planet e ecuivâl ae fin de biosfere. (A.I.) – 29.03.2024