La colezion Ciceri e dutis lis altris al centri di une cunvigne

A 25 agns de muart de studiose furlane Andreina Nicoloso Ciceri, la Universitât di Udin e presente joibe ai18 di Setembar, la catalogazion e la digjitalizazion di une part dal so fonts fotografic che si cjate tal Museu etnografic dal Friûl. L’apontament, che si intitule “Quasi in vetrina” (Cuasi in vetrine) e che al fevelarà di etnografie, ogjets e colezions de studiose, e no dome, si fasarà aes 9 di buinore de sale cunvignis de fondazion Friuli, tal palaç Antonini–Stringher di Udin. E sarà la ocasion par vignî a bon dal lavôr di cognossince e di aprofondiment de storie e de etnografie regjonâl e par vierzi un cantin di riflession ator aes colezions che si cjatin in Friûl-Vignesie Julie. Dongje de colezion di Andreina e Luigi Ciceri, achì si cjatin ancje lis colezions di Luigi Gortani, Giovanni Cossar, Gaetano Perusini, Diogene Penzi: un patrimoni di racuei e, se al fos pussibil, di meti a disposizion di cui che al vûl. (A.I.) – 17.09.2025