La bielece e fâs ben al cerviel

Si vierç joibe ai 22 di Setembar la 15e edizion dal cicli di incuintris “Affascinati dal Cervello”, storic cartelon di apontaments dedicâts aes neurosiencis a cure de IRSE, Istitût Regjonâl di Studis Europeans. “Neuroscienze della bellezza” al è il teme dal gnûf percors di “conversazions su robis bielis che a fasin ben al cerviel”, fin ai 13 di Otubar a Pordenon. Acetant la fuarte dibisugne coletive di “bielece”, i organizadôrs a vuelin capî se e cemût che lis neurosiencis a puedin judânus a nudrî il benstâ psicofisic, partint di une domande: ce sucedial cuant che si cjale alc di biel tant che une opare di art? La prime cunvigne aes 5.30 dopomisdì intal Auditorium de Cjase dal Student cui esperts Marcello Turconi e Marta Calbi, e po dopo une leture di teatri contemporani par cure di Lisa Moras. (A.I.) – 21.09.2022