La art de tiessidure tes aziendis

Un viaç jenfri tradizion e inovazion, la memorie e il dì di vuê. “L’ARLÊF – Tessere un futuro” (Tiessi un avignî) al è il non dal gnûf progjet di esposizion itinerante, a jentrade libare sore nuie, dedicât ae art de tiessidure e aes aziendis tessilis de regjon, che al met dongje art contemporanie, artesanât, sostignibilitât e inclusion sociâl. Un progjet che al instrece storiis e comunitâts par fâ sù adun gnovis visions dal avignî, inmaneât di Madame Rebiné, une associazion culturâl nassude tal 2021 a S. Quarin che e met in vore progjets culturâi instreçant il mont produtîf e la ricercje creative. La mostre multidissiplinâr, nassude par dâ plui fuarce al leam dal patrimoni artesanâl cu la inovazion artistiche e il disvilup culturâl dal teritori, e propon un percors fat di oparis tessilis fatis cun materiâi ecosostignibii, gnovis interpretazions di monturis tradizionâls, spetacui di art e operazions multimediâls. Cjalant lis oparis metudis in mostre, il public al podarà scuvierzi lis fasis di lavorazion dai tiessûts, cognossi lis aziendis dal teritori – Arteviva di Liviana Di Giusto, Tessitura di Sauris di Cristian Petris e Carnica Arte Tessile – e rifleti ator lis disfidis de filiere dal setôr. In esposizion ancje la colezion VesteMMundi e cualchi opare dal Premi “Valcellina Award”, de associazion Le Arti Tessili APS. La rassegne e va indevant fint a Setembar cun spetacui e esposizions ator pal teritori, a S. Vît dal Tiliment, Pordenon, Sauris e Udin. (A.I.) – 19.04.2026