La art dai agns Setante ancje a Gardiscje

Il program di events colaterâi de mostre “Italie Setante. Art, mode, dissen” che e je in cors cumò a Gurize, al va indevant cu la scree a Gardiscje de mostre “FVG70.02. Gnûfs modei di ricercje”, il secont cjapitul di “F-Vj Setante. Arts visivis in Friûl-Vignesie julie tai agns Setante.” Di joibe ai 23 di Lui fint ai 29 di Novembar, la Galarie regjonâl di art contemporanie “Luigi Spazzapan” e darà la pussibilitât di analizâ un moment artistic che al à ancjemò di jessi ricognossût dal dut tal nestri teritori nazionâl. Te sene artistiche taliane dai agns Sessante e Setante dal Nûfcent, il Friûl-Vignesie Julie al jere une regjon plene di esperiencis, lenghis e esperiments impuartants, che dut câs a àn cjapât dome un ricognossiment parziâl te storiografie nazionâl. La mostre e ufrîs une reinterpretazion di chel timp midiant dal concet di “mûr invisibil”: une bariere simboliche che e divideve la vitalitât de ricercje artistiche regjonâl de sô plene ricezion critiche. (A.I.) – 22.07.2026