La aghe, un dirit che al va spiegât

La aghe e je une risorse limitade, un ben di ducj, un dirit universâl e propit par chel e à dibisugne di protezion. Par chest al è nassût il “Festival dell’Acqua” (Festival de aghe) di Staranzan, une manifestazion multi dissiplinâr di divulgazion sientifiche, uniche tal so gjenar, che e torne pe seconde volte a Staranzan e tai Comuns li dongje, dai 16 ai 19 di Mai. Intun teritori che al à un rapuart speciâl cu lis aghis che alì si incuintrin – chê dal mâr, dal Lusinç e dal palût – la rassegne e fevele di chest element doprant lengaçs diferents, bogns di rivâ a tirâ dongje un public larc, fasint atenzion a lis gnovis gjenerazions. Doprant sience e art, tal program si alternin cunvignis e spetacui, percors di ricercje, laboratoris, ben cuatri mostris e cetant altri, cun personalitâts innomenadis de divulgazion sientifiche, ricercjadôrs, students e artiscj dal spetacul dal vîf: nons tant che Marco Paolini, Massimo Cirri, Marina Senesi, Angelo Floramo, i climatolics Elisa Palazzi e Andrea Cicogna. Prime des cuatri zornadis dal festival, cualchi anteprime: la consegne dal Premi “Eugenio Rosmann” sabide ai 4 di Mai, une cunvigne spetacul sui cambiaments climatics cui atôrs Manuel Buttus e Roberta Colacino, une escursion su la isule de Cona e la presentazion di un libri sui fûcs tal Cjars la setemane dopo. (A.I.) – 14.05.2024