La aghe, il centri di un lûc di incrosaments

Une rassegne sientifiche multidissiplinâr, ma cun cetancj ospits dal mont dal spetacul, de leterature e de art, intun paîs nassût suntune bonifiche intal unic lûc de regjon là che si incrosin un flum, la lagune e il mâr, Staranzan. Il “Festival dell’acqua” rivât ae tierce edizion al propon dai 22 ai 25 di Mai une schirie di contignûts storics, sientifics e ambientai midiant leghis diferentis par fevelâ a publics diferents, tacant des gnovis gjenerazions. Il teme al centri de prime rassegne regjonâl dedicade dome ae aghe a son il cambiament climatic, la sêt, la straçarie e l’ecès tal doprâ la aghe, contade in cunvignis, ativitâts pes scuelis, leturis, spetacui di teatri e musiche cuntune trentine di apontaments, ducj cence sore nuie. La sience e reste tal mieç, ancje cu la presince di personalitâts innomenadis de divulgazion e informazion, par contâ cemût frontâ i problemis leâts ae aghe. Dongje des mostris screadis sul teritori (Wetland Designers, Museum of Edible Earth, Storie tessute…) a son in program ancje une conference spetacul di Marco Bergamasco, il “Bestiario idrico” di Marco Paolini, che al puarte ancje “Corvide”, Andrea Pennacchi che al fevele di “aliens in lagune” cun Nicola Bressi, e un conciert par “violoncel, vôs e gotis di aghe” di Mario Brunello e Mariangela Gualtieri. (A.I.) – 21.05.2025