“Joibe Grasse” dut il dì su Onde Furlane

Ai 27 di Fevrâr dal 1511, une des zornadis plui impuartantis de storie dal Friûl, e je la date dal riviel popolâr plui grant in Friûl, passât ae storie cul non di “riviel de Joibe Grasse”. Intes campagnis e fo une rivendicazion dai “dirits antîcs” des comunitâts rurâls, e propit par chel, za di un pôc di agns, chest aniversari al ven celebrât di Radio Onde Furlane come se al fos un dì di fieste par dut il Friûl: la “Zornade Furlane dai Dirits”. La ricorence e sarà la ocasion ancje chest an par une programazion speciâl dedicade a chei fats e ancje par stiçâ la riflession sui dirits fondamentâi e su lis bataiis par difindiju. Tra selezions musicâls a teme e rubrichis di aprofondiment, sui 90 Mhz e in streaming des 8 di matine aes 6.30 dopomisdì e je previodude une lungje schirie di apontaments. (A.I.) – 26.02.2024