Il teatri di mont a Pordenon

La mont che no si lasse contâ di lontan o cjapâ dentri dome di cui che al cîr un bielvedê, no vîf intune cartuline o tes publicitâts turistichis plenis di nêf: e je la “mont di mieç” che e tire indevant tignint dûr tai boscs, i borcs e lis valadis là che la vite e cîr di resisti al dispopolament. Aes buteghis che a sierin, ai grancj centris simpri plui lontans, ai fastidis di ogni dì, ae fadie di vivi ancjemò là sù, ma cence mai molâ la cure, la ricercje de bielece dal cidinôr… Cheste mont e je la protagoniste di “Montagna Teatro Festival 2025”, une rassegne inmaneade dai CAI, il Club alpin talian, tal teatri “Verdi” di Pordenon par cuatri dîs, dai 11 ai 14 di Dicembar. Une rassegne che e je une conte coletive che e instrece art, nature, sience e comunitât doprant teatri, musiche, danze, poesie, leterature e incuintris cun ospits nazionâi, par tornâ a dâ ae mont la pussibilitât di jessi un spazi di dialic. Pe Zornade internazionâl de mont, joibe ai 11, il “Verdi” al scree il festival cun “Notte Morricone”, di Marcos Morau par Aterballetto, cu lis musichis di Ennio Morricone. Tai dîs che a vegnin, cunvignis, une anteprime di “R-Evolution Green”, concierts, presentazions di libris ancje di “poesie di mont”, musiche e teatri. A sierâ, il spetacul sui arbui dal espert Stefano Mancuso, sul palc cul atôr Giovanni Storti e la regjie di Arturo Brachetti. (A.I.) – 10.12.2025