Il poete trastolon al torne cui “conseis par viaçs interstelârs”

Dople anteprime par “Suns Europe”, il festival des arts performativis tes lenghis minorizadis, inmaneât de cooperative Informazione Friulana, editore di Radio Onde Furlane, cu la poie di Arlef, la Agjenzie regjonâl pe lenghe furlane, che e torne dai 27 di Novembar ator pal Friûl. Prime de viertidure uficiâl, Codroip al sarà il prin palc, cun doi apontaments di leterature, musiche e identitât linguistiche fats in colaborazion cul Comun e cul premi leterari “San Simon”. Martars ai 21, aes 5 e mieze di dopomisdì, la la biblioteche “Don Gilberto Pressacco” e darà acet ae prime presentazion assolude dal gnûf libri di Stiefin Morat, “Conseis par viaçs interstelârs”: il prodot di une des vôs plui origjinâls e visionariis e leterature furlane contemporanie (dai Trastolons a “Donald dal Tiliment”). Il libri – presentât cun Sandri Carrozzo, autôr de prefazion, e Paolo Cantarutti – al è un viaç che al puarte il letôr fûr de Tiere e fûr di se, intun Univiers inospitâl là che par salvâsi bisugne dome scuvierzi chei altris e condividi la strade di fâ. (A.I.) – 20.10.2025