Il poete Tavan suntun condomini di Udin

Il plui innomenât salacor al è chel di Zico, piturât fûr dal club di Orsarie di Premariâs e screât cualchi setemane indaûr, devant dal campion brasilian, un tic ingropât a viodi il biel lavôr. Dut câs l’udinês Simone Mestroni, nassût tal 1989, al piture di agns i mûrs di cjasis e lûcs de citât, lavorant soredut a un progjet clamât “Citât de poesie”, finanziât de Ater di Udin inte suaze di une schirie di iniziativis di ricualificazion citadine. Tal borc di Udin Est cognossût cul non de strade principâl, vie Riccardo (Di Giusto), Mestroni al à za piturât tai ultins agns une grande decorazion murâl cul poete Giosuè Carducci su la façade laterâl di un condomini, un ritrat grandonon di Giovannino Guareschi e, sul casermon in bande, une piture grande cuatri plans (passe 10 metris par 10) dedicade ae poete Alda Merini. Di cualchi dì, Mestroni al à finît l’ultin lavôr: Federico Tavan, il poete di Andreis muart tal 2014, che al scriveve intune variant locâl e personâl dal furlan. Un autôr forsit ancjemò masse pôcs cognossût fûr di chenti, ma che propit par chel al meretave un spazi grant devant di ducj chei che a passin di la. (A.I.) – 01.08.2025