Il picet di Gurize al cjate l’artist Celiberti

Lis tramis dal picet di Gurize a àn simpri contât une storie fate di memorie, inovazion e avignì: si tornin a leâ cul passât, a interpretin il dì di vuê e a vierzin gnovis prospetivis creativis. Chest dialic jenfri tradizion e ricercje al à prodot la mostre “Intrecci di segni e di fili: Giorgio Celiberti incontra il Merletto goriziano “Segns e fîi instreçâts: Giorgio Celiberti al cjate il picet di Gurize”, vierte te showroom “Merletto Goriziano” a Gurize in Corso Verdi 86. Chest progjet al met dongje il lengaç artistic dal mestri furlan cu lis ecelencis des mestris dal picet gurizanis. Lis origjinis de iniziative a van indaûr di cetancj agns, cuant che Miriam Mauri, in chê volte diretore de Scuele di picet di Gurize, e cognossè Celiberti, preseant la sô straordenarie viertidure e sensibilitât. In chê ocasion, il mestri al donà ae scuele une schirie di studis, tacant un viaç creatîf che al varès puartât ae creazion di oparis mai viodudis prime. Lis mestris a acetarin la sfide di tradusi il stîl penç e evocatîf di Celiberti tal picet. Il risultât e je une racuelte di oparis dulà che i segns essenziâi dal artist a cjatin une gnove armonie midiant de finece dal picet di Gurize. (A.I.) – 25.06.2026