Il passât ‘dismenteât’ di Tor di Zuin

Une zornade dedicade ai abitants dal Villaggio Roma di Tor di Zuin: chei che a son a stâ li di agnorums, chei che a son lâts vie e a podaran cussì rivivi i lôr ricuarts midiant di fotografiis di cincuante agns indaûr. Ma ancje chei che a son rivâts di pôc dal forest e a puedin imparâ di plui su la storie dal lôr gnûf paîs. Chest al è l’obietîf dal event organizât de Pro Torviscosa par domenie al prin di Març, inte ex scuele elementâr dal borc. Aes 11 di buinore al sarà presentât il libri “Villaggio Roma. Fotografie”. Il libri al documente il passât dal paîs prime de demolizion de ex caserme dal cjamp di presonie numar 107, che e jere deventade la cjase pai lavoradôrs agricui da SNIA Viscosa daspò de seconde vuere. Cualchidune di chestis fotografiis e je ancje presentade inte mostre ospitade te ex scuele elementâr, compagnade di une vuide audio in dutis lis lenghis feveladis vuê in paîs, ancje forestis. Tal dopomisdì si viodarà “Manodopera” di Alain Ughetto, un cine di animazion che al conte la storie dai nonos dal regjist, che a jerin emigrâts in France tai prins agns dal 1900. (A.I.) – 28.02.2026