Il gnûf câs di Veit Heinichen in Badie

Joibe ai 17 al torne aes 6 dopomisdì inte Badie di Rosacis (in comun di Manzan) il scritôr Veit Heinichen cun “A maglie strette” (A maiis strentis), pal secont apontament de sezion aviertane de decime edizion de rassegne “I colocuis de Badie”, curade e condote di Elda Felluga e Margherita Reguitti e inmaneade de Fondazion Abbazia di Rosazzo e de aziende “Livio Felluga”. Un romanç che al conte, te maniere che dome Heinichen al sa fâ, in forme di zâl, la anime di une citât, Triest, che e cambie intal so tiessût urbanistic, cuntune presince inmagante: il mega yacht cun trê arbui dal oligarc rus Andrey Melnichenko, fer in puart dal principi de vuere. (A.I.) – 16.04.2025