I voi su la Seconde vuere par rifleti sul valôr de pâs

Ancje se la capitâl europeane de culture Gurize-Gnove Gurize e à sierât cuntune cerimonie cualchi setemane indaûr, fint ai 3 di Mai dal 2026, il palaç Attems Petzenstein di Gurize al ospite une gnove grande mostre dal cartelon di events di GO!2025. “Back to Peace? La guerra vista dai grandi fotografi Magnum”, par cure di Andrea Holzherr e Marco Minuz, al è un progjet di valôr simbolic e storic grandonon. Un event unic tal so gjenar, in esclusive pe Italie: e je la conte dal secul de vuere e de pâs fate dai plui grancj mestris de fotografie mondiâl de storiche agjenzie Magnum. Inte plui grande racuelte fin cumò di fotografiis – passe dusinte – fatis vie pe Seconde vuere mondiâl e tai prins agns daspò de fin dal conflit si tache des “iconis” di Robert Capa, lis fotografiis di George Rodger tai cjamps di concentrament, l’efiet de bombe atomiche fotografât di Wayne Miller, la Europe a tocs viodude di Werner Bischof e vie indevant. Inmaneade dal Erpac, l’Ent regjonâl pal patrimoni culturâl dal F-Vj, compagnade di instalazions multimediâls, tocs militârs dal timp de vuere e musichis scritis di innomenâts compositôrs talians, la esposizion prodote di Suazes e Magnum Photos no jo dome che une mostre fotografiche. Prin di dut, une riflession coletive ator de memorie, de fragjilitât dal om e de ricercje de pâs, fate propit a Gurize – cu lis sôs crevaduris dal Nûfcent – par tornâ a dâ vôs e voi al passât e cirî di dâ un messaç di sperance pal avignî. (A.I.) – 30.12.2025