I “scarts” dome tal titul di “vicino/lontano”

A son dome cinc dîs, ma cun passe cent apontaments e dusinte ospits pe vincjesime prime edizion di “vicino/lontano”, une rassegne che al è un scandai sul mont dal dì di vuê. Une riflession ator de peraule “scarti”, scarts, ma tal sens di ‘salts’, fraturis, svoltis, cambiaments, e ben ancje cul significât di esclusion, emargjinazion, rimozion. Intun mont in tampieste, là che al è dificil cjatâ la direzion ancje dome orientâsi, a Udin si sielç ancjemò une volte di cirî di dâ cualchi rispueste cu lis vôs di preseâts ospits dal mont de culture, de leterature, de sience, de art, dal spetacul e de informazion, simpri plui a risi. Nol è un câs se l’apontament plui impuartant dal festival – dongje dai confronts, incuintris, mostris, spetacui e proiezions -, ven a stât il premi “Terzani” intal non dal scritôr Tiziano Terzani, chest an nol è lât come simpri a un autôr/une autore di libris, ma al è stât dedicât ae memorie dai gjornaliscj e des gjornalistis di Gaza. A cjapâ in maniere simboliche il Premi, a non dai tancj coleghis copâts dilunc de vuere, sabide ai 10 di Mai tal Teatri Gnûf “Giovanni da Udine” des mans de jurie vuidade di Angela Terzani, a saran doi gjornaliscj de emitent Al Jazeera: Wael al-Dahdouh e Safwat al-Kahlout, i ospits de serade ‘di gale’ de rassegne. Pe scree, come simpri, l’intervent dal plui grant espert di gjeopolitiche in Italie, Lucio Caracciolo, daspò des lezions di Tomaso Montanari e Paola Caridi. E po dopo, i spetacui in sene, lis mostris, i libris, i autôrs… (A.I.) – 06.05.2025