I paisaçs di Mocchiutti mai viodûts prime

No je dome che une esposizion, ma un percors par scandaiâ un teritori che al à burît une sintesi artistiche uniche. Propit il confin che al à dividût Gurize, al à ancje judât la nassite di une realtât buine di messedâ lis culturis diferentis, austriache, slave, latine e furlane, cuintri ogni logjiche di division. La gnove mostre li dal Smart Space de Fondazion Cassa di Risparmio di Gurize, vierte fint al Prin di Novembar di chest an, e fâs part di un gnûf progjet culturâl propit ator dal teritori, massime te seconde part dal secul passât. La prime tape di “Sguardi Nascosti”, Vogladis scuindudis, e je dedicade a Cesare Mocchiutti (1916-2006) e cul titul “Figure – Paesaggi – Silenzi” (Figuris, paisaçs, cidinôrs) e rapresente une selezion di oparis mai viodudis prime, parcè che gjavadis fûr di colezions privadis: pituris, dissens, ceramichis, sculturis in bronç che a contin l’univiers dal artist e la sô sielte di un lengaç di là dai confins. In ativitât de za tai agns Cuarante dal secul passât, Mocchiutti al è stât un dai protagoniscj de culture gurizane dal Nûfcent, cu lis sôs ‘iconis’ de piture: la cjace, il flum, i cjamps, i corvats, i braconîrs, i cjantestoriis…Un mont contadin cun dute la ritualitât de tradizion popolâr, ma ancje une interpretazion origjinâl e personâl dal jessi furlans. (A.I.) – 26.03.2026