I mestris dal passât e i artiscj di vuê

Undis mestris de art dal Nûfcent in dialic cun sîs dal dì di vuê intune mostre sui trê plans dal storic edifici dal Tresinte di S. Vît dal Tiliment, l’Antico Ospedale dei Battuti. Si cjatin te mostre “Confine di carta – Artisti storici per visioni contemporanee” curade di Eva Comuzzi, la gnove tape de rassegne “Borderland/Orizzonti”, ae vincjesime edizion. Pe prime volte, il public al podarà viodi une selezion di oparis su cjarte – grafichis, dissens e tecnichis mistis – de colezion privade de famee Sottile di Cormons. Undis artiscj nassûts o vivûts a Gurize, Gardiscje e Triest de fin dal Votcent al Doimil (Spazzapan, Spacal, Dorfles, Mušič…) che a “fevelin” cu lis oparis di sîs atîfs in regjon tal coletîf Esecrandi, nassût tal 2015 (Marisa Bidese, Renzo Cevro-Vukovic, Giuliano Marian, Orietta Masin, Gianni Pasotti e Giammarco Roccagli), par mostrâ che il confin nol è un lûc di division, ma un spazi di esplorazion e imagjinazion. (A.I.) – 24.05.2026