I libris tes stradis e tes placis di Tumieç

Al sarà un fin de setemane penç, siôr di apontaments e dut tal segn dai libris e dai autôrs. Di cuatri agns, “Tolmezzo vie dei libri” (Tumieç, i troiis dai libris) al rapresente une sinfonie di vôs, di contis e di esperiencis che si instrecin tal cûr de Cjargne e de Europe, là che la frontiere e je aromai deventade une oportunitât pe cognossince e no dome un limit. Trente i events in dut dai 12 ai 14 di Jugn: incuintris, dialics, itineraris te nature e te culture, visitis vuidadis ai museus e no dome, musiche dal vîf e art. Il festival al invide ancjemò une volte la citât a “lâ in place” par un cartelon di events promovût de aministrazion comunâl cu la poie de Regjon, in colaborazion cu la Fondazione Pordenonelegge.it, cu la stesse direzion artistiche de rassegne pordenonese, Gian Mario Villalta cu la cure di Alberto Garlini e Valentina Gasparet. Meti la culture al centri pe incressite dal teritori al è stât centrâl a tacâ de prime edizion, adun cu la sielte di cirî un dialic cu la Slovenie, cheste volte cun cuatri apontaments che a tirin dentri i scritôrs de nazion di là de frontiere, ma ancje cuntun progjet dedicât ae traduzion di Dante par sloven. La liste dai ospits e je lungje, e sarà screade di Marcello Veneziani , ma al è miôr segnâsi Ilaria Tuti, la scritore furlane di oparis di grant sucès che è a sielt une tape ‘di cjase’ par presentâ in anteprime sabide ai 13 il gnûf romanç “Ed è un poco la notte e un poco l’alba”, che al ven fûr trê dîs dopo e al è ambientât propit in Cjargne. Altris protagoniscj dai trê dîs dal festival – che al sarà – a son Antonio Caprarica, Toni Capuozzo, Andrea Maggi, Piergiorgio Pulixi, Fulvio Marino, Guido Sgardoli, Paolo Cossi, Elena Commessatti, Silvia Sanna, Francesco Vidotto. E sot sere, daspò dai altris apontaments, la musiche;: vinars ai 12, Federico Sirianni e il Trio Alcyon; sabide ai 13, omaç aes vôs talianis de musiche dai agns Setante par cure di Valerio Marchi, Letizia Felluga e Alessandro Scolz e domenie ai 14, la musiche dai Pink Floyd sunade e contade dai Pink Planet. (A.I.) – 11.06.2026