Presentâts vuê il prin numar dal setemanâl “La Vôs dai furlans” e il sît web di informazion cuotidiane, dute in lenghe furlane, publicâts dal Gruppo MediaFriuli.
“Pe difusion e promozion de lenghe furlane il teme de informazion gjornalistiche al è centrâl: une comunitât e à bisugne di vê rispuestis su chest servizi, parcè che al è il mût plui diret par vê une impostazion cuntune lenghe inte cuotidianitât. La Regjon e à finanziât cun 100 mil euros par un trieni un bant gjestît di Arlef. Vuê al jemple di braùre tignî a batisim une gnove iniziative editoriâl dute par furlan”. Lu à sotlineât, vuê a Udin, l’assessôr regjonâl aes Lenghis minoritariis Pierpaolo Roberti, dilunc de presentazion di cheste gnove iniziative contade dal aministradôr e diretôr editoriâl Alfonso Di Leva e dal diretôr responsabil Rossano Cattivello. Al apontament a jerin presints il president dal Consei regjonâl Piero Mauro Zanin e il president de Arlef (Agjenzie regjonâl pe lenghe furlane) Eros Cisillino.
“Il furlan tant che lenghe di doprâ simpri e dapardut e je la clâf di volte par garantîi un futûr – al à dit il president dal Consei regjonâl Zanin – come che a fasin dulà che a àn capît che la lenghe minoritarie e je un element fondamentâl de specialitât e de autonomie”.
La iniziative, che e rispuint a plen al Plan di politiche linguistiche regjonâl, e je stade preseade dal president de Arlef, che al à marcât trop che al è essenziâl impegnâsi, a ogni nivel, “par judâ la cognossince e l’ûs de lenghe furlane. In chest sens – al à zontât Cisillino -, graciis al Gruppo MediaFriuli pal sfuarç fat, a front di un bant regjonâl che, par adiudicâsal, al domandave un nivel une vore alt”.
Di Leva al à sotlineât la dople impuartance de iniziative editoriâl e trop che al è impuartant tutelâ e al timp stes doprâ ogni dì la lenghe de comunitât.
Il diretôr Cattivello al à ricuardât la gjenesi dal progjet “cussients cemût che o sin che la lenghe e je tra i elements che a fondin la nestre comunitât. O stin cjalant indenant parcè che une lenghe e à bisugne di une comunitât fasintle plui unide e une comunitât plui unide e je buine di imagjinâ il so futûr”. (ADG) – 25.11.2022
3 coments
Braus!!! I vevin bisugna di tornà a lei in furlan.
Bundi a ducj.
Par abonaasi ?
Mandi
Bundì. Come che al è scrit sul gjornâl a pagjine 10: Abonament anuâl 40 euros – paiament su c/c post. n. 15305337 intestât a Editoriale Il Friuli, vie Nazionale 120, Tavagnà – bonific bancjari: Banca Intesa Sanpaolo – Agjenzie Vie Cavour – Udin – Codiç Iban: IT 32 F 03069 12344 100000000771
Graciis.