I fantats a consein i lôr libris favorîts

E je daûr a sierâsi la prime fase dal concors regjonâl “Un libro da consigliare”, inmaneât dal Consorzi culturâl dal Monfalconês inte suaze di LeggiAMO 0-18, progjet di promozion de leture de Regjon. Domenie ai 30 di Avrîl e je la scjadince ultime dentri di chê i fantats dai 11 ai 18 agns di dute la regjon a puedin consegnâ i lôr elaborâts par conseâ il libri favorît ai lôr coetanis. “Un libro da consigliare” – ae sô decime seste edizion – al invide fantatis e fantats a no jessi dome fruitôrs, ma part ative dai conseis di leture. L’obietîf al è che i zovins e lis zovinis – cul jutori dai lôr coetanis traviers un passeperaule – a puedin cjatâ la proprie strade tra i libris bogns di cjapâju, emozionâju e ispirâju. (A.I.) – 27.04.2023