I 50 agns dal Atlant linguistic dal Friûl

E je titulade “Gli atlanti linguistici regionali” la cunvigne organizade de Filologjiche pai 50 agns dal Aslef – l’atlant storic, linguistic, etnografic furlan, inmaneade martars ai 22, tacant des 3.30 dopomisdì, a Palaç Mantica, in vie Manin a Udin. La cunvigne, ancje miercus di matine, e conte la storie de imprese di ricercje dal Aslef, il prin atlant regjonâl linguistic di Italie. “Un archivi di peraulis – al sclarìs Federico Vicario, il president de Societât Filologjiche – tiradis dongje sul teritori in maniere direte de vôs dai ‘informadôrs’: un grant afresc che nus permet di preseâ la varietât di soluzions ae base de lenghe stesse. Ma al è ancje un lavôr no cognossût de maiorance dai furlans,cundut de sô impuartance par argoments tant che lenghe, ambient, culture e tradizions”. (A.I.) – 21.11.2022