I 45 agns de riviste di art “Juliet” a Palme

Cuarante cinc agns indaûr, tal mês di Dicembar dal 1980, e nassè la riviste di art “Juliet” cuntun “cjanut spude fûc” dissegnât di Oreste Zevola su la cuviertine. In curt: un riferiment par dut il mont artistic in Italie e no dome in regjon, che fint a vuê, ven a stai al numar di Dicembar dal 2025, al è jessût cun 225 numars e almancul un centenâr di edizions disoreplui (par fevelâ di dissen, fotografie e cetant altri…). Di cuant che al è vignût fûr il prin numar, in pocjis copiis, la riviste e veve za chel di deventâ un racuardi jenfri la contemporaneitât, mostrade cu lis imagjinis, e lis teoriis critichis plui gnovis, cirint dut câs une mediazion. Il fondadôr Roberto Vidali, nassût a Cjaudistrie tal 1953, diretôr editoriâl de riviste dal 1980, al è un preseât critic che al à metût adun desenis di mostris e scrit cetancj contribûts ae ricercje critiche ator de art contemporanie. La storie de riviste si pues viodi te mostre “Juliet art magazine – Since 1980”, cu la colezion dal archivi dai fondadôrs Davio Fabris, Giuliana Ferrara, Rolan Marino, Antonio Sofianopulo, Roberto Vidali e Oreste Zevola, inmaneade dai spazis de Polvariere Napoleoniche Foscarini a Palme di sabide ai 20 e fint ai 18 di Zenâr dal 2026. Al centri, lis 225 cuviertinis che a an contât la evluzion de art contemporanie a nivel internazionâl. (A.I.) – 19.12.2025