I 330 agns dal Tiepolo

Al nassè a Vignesie ai 5 di Març dal 1696 e a 14 agns al lavorave za tune buteghe di art de citât. Ancje daspò di 330 agns, Giambattista Tiepolo al è un dai artiscj plui innomenâts a nivel internazionâl dal Sietcent venezian, atîf ator pe Italie, massime in Venit e a Udin, là che al à lassât cetantis oparis fatis daûr incarghe di cualchi famee nobil furlane o veneziane, di zovin o cul fi Giandomenico, dentri di palaçs o glesiis. Innomenât pai siei frescs e i cuadris di contignût storic, mitologjic e soredut religjôs, clamât “l'ultin grant pitôr sacri de Europe”, Tiepolo al è leât strent a Udin, che i passionâts di art di divignince gjermaniche a clamin “la citât dal Tiepolo” pal numar grant di oparis esponudis tal Palaç Patriarcjâl, la sede dal Museu diocesan e Galariis dal Tiepolo, ma ancje tal Cjistiel, tal Domo e tal Oratori li dongje. Pe cuarte volte a tornin "I lûcs dai Tiepolo in fieste", un omaç che si fâs in 11 citâts di cuatri regjons, cun passe trente apontaments – concierts, visitis vuidadis, conferencis. Ae seste edizion, invezit, “I Tiepolo nell'Europa del Settecento”, la rassegne inmaneade di Itineraria cuntun program di ricercje e divulgazion che al tire dentri ancje musiche, turisim culturâl e apontaments enogastronomics. (A.I.) - 05.03.2026