Gurize e Nova Gorica a anticipin il 2025 cu la ‘fin dal confin’

“Fine del confine” (Fin dal confin) al è il titul di un progjet internazionâl di land art, instalazions video sonoris e performance pensadis par passâ i confins, gjeografics e mentâls, e tornâ a vitalizâ i parcs publics transfrontalîrs dal nestri teritori, trasformantju in spazis culturâi vierts. Il progjet al larà in sene par cinc dîs, dal 7 ai 11 di Setembar, al Parco Basaglia di Gurize e tal Adventure Park di Ceroglie/Cerovlje, che a deventaran cantîrs culturâi e di libar incuintri fra artiscj, nature e teritori. La iniziative e propon di fat concierts, incuintris, land art, une rassegne cinematografiche, presentazion di libris e progjets relatîfs su lis dôs bandis dal confin: une sorte di anteprime dal 2025, cuant che Gurize e Nova Gorica a saran adun Capitâl europeane de culture. (A.I.) – 06.09.2022