Giorgio Felcaro al presente a Cormons il so gnûf libri

Sabide ai 12 di Novembar, aes 6.30 sot sere, inte Cantine produtôrs di Cormons, al sarà presentât il gnûf libri dal scritôr Giorgio Felcaro. Si clame “Tra Albe e Tramonti” e al ven daspò l’esordi intitulât “Un giorno da inventare”, deventât un vêr sucès editoriâl, par Albe Edizioni, di Milan. Al è un romanç che al partìs de aventure contade intal prim libri, dulà che un grup di fantats cormonês, inte metât dai agns setante, al fâs un viaç improvisât tra Cormons e Tramonç di Mieç. Si conte de adolessence intun mont che al è daûr a cambiâ a la svelte. Intal secont libri, la storie si disvilupe il dì dopo la aventure in biciclete. I protagoniscj di cheste storie vere, a son simpri diviers dai fantats che a àn acetât la sfide e che si cjatin a vivi la epopee dal taramot, metûs adun di un fuart spirt di amicizie. La descrizion dai personaçs e cjalce une vore ben, il ritmi al è bon e ancje la dinamiche dai fats si disvilupe in mût convincent. I protagoniscj, adolessents, a rifletin su chel che al è un pont di passaç pal lôr futûr. Al è cui che al deventarà campion di basket e cui che al fasarà l’imprenditôr, ma e je fuarte la olme de amicizie e de cussience. (ADG) – 10.11.2022