Gasparini: l’artist venezuelan al torne a Gurize

A cjase “Morassi” a Gurize, la mostre di Paolo Gasparini “Via per le strade” (Fûr pes stradis) si vierç vinars ai 24 aes sîs di dopomisdì e po dopo e va indevant fint ai 27 di Setembar. La esposizion e mostre i siei fotomurâi, une forme di espression che e trasforme la fotografie in composizions su scjale grande. I temis tratâts tal progjet a rivuardin lis lidrîs culturâls e identitariis di chei che a àn passât dute la vite lontan de lôr patrie. Promovût e sostignût dal ERPAC, Ent Regjonâl pal Patrimoni Culturâl dal Friûl-Vignesie Julie e de Regjon in colaborazion cul CRAF di Spilimberc, Cun “Via per le strade”, un dai grancj mestris de fotografie contemporanie al torne propit dulà che al è nassût tal 1934, prime di partì pal Venezuela tal 1954, là che al deventà un dai artiscj plui impuartants de sô gjenerazion. (A.I.) – 23.04.2026