Garlatti-Costa e lis lidrîs di Aquilee

Tai ultins agns, il regjist udinês Massimo Garlatti-Costa al è lât indaûr te storie di cheste tiere par fevelâ soredut di lidrîs e di glesie (“Missus”, “Predis”). Il gnûf documentari “Aqvileia e i cristianesimi perduti” al è un viaç te storie di une des plui impuartantis citâts dal mont antîc roman: une crosere di culturis, cumierç e religjons jenfri Ocident e Orient. Il documentari al esplore la ete cuant che il cristianisim nol jere ancjemò une dotrine ugnule, ma un univiers complicât di corints spirituâls, interpretazions, visions e comunitâts diferentis: diferentis de fede che a Aquilee e deventà alc di origjinâl. Doprant mosaics, reperts archeologjics, studis e i contribûts di esperts e ricercjadôrs (tacant des ricercjis di Giuseppe Brusin, Renato Iacumin e Guglielmo Biasutti), al ven fûr che prime de omologazion cuntune uniche veretât imponude dal alt, achì al jere plui di un cristianisim: versions diferentis cjapadis su dal mediterani e disvilupadis in formis gnovis. Il documentari, che al fronte argoments pôc cognossûts e dispès scancelâts de narazion tradizionâl, al è prodot di Glesie Furlane cu la poie de ARLeF e de Film Commission de Regjon F-Vj. La anteprime e je stade fate a Gurize tal “BorGO Cinema” di vie Rastello, te suaze di “èStoria”, il festival internazionâl di storie. (A.I.) – 01.06.2026