“Friuli Storia”: ve chi i trê finaliscj

Trê storics autorevui, cu lis lôr riflessions sul Nûfcent, “lûc comun de memorie”, a rivin ae fase finâl dal premi Friuli Storia, che al celebre chest an il so decenâl. I finaliscj anunziâts de edizion 2023 a son Vittorio Coco par “Il Generale Dalla Chiesa”, Thomas Hippler par “Il governo del cielo” e Andrea Riccardi par “La guerra del silenzio”. Il tercet finalist dal premi pal miôr saç di storie contemporanie publicât in Italie al è stât selezionât fra 93 oparis, candidadis dai editôrs, traviers il lavôr de jurie sientifiche. Ma ancje di une “comunitât” di 500 letôrs di dute Italie. La consegne dal premi e je in program joibe ai 28 di Setembar a Udin. (A.I.) – 30.05.2023