Fieste pal cuart aniversari di “Spazio35” tal borc de stazion

Une fieste di cuartîr par celebrâ i cuatri agns di ativitât e la comunitât che e je vignude sù tal borc de stazion di Udin. E je inmaneade par martars ai 30 dal Spazio35 e de associazion Costraint, che a vierzaran lis puartis dal spazi socioculturâl a ducj , a tacâ des 6 e mieze di dopomisdì, par fâ fieste in ocasion dai cuatri agns di colaborazions, relazions e ativitâts cui abitants dal borc, di dutis lis etâts, gjenars e divignince. La fieste si vierzarà cul conciert dal tercet Francesca Bertazzo che al siere i events de “Biblioteche in Jazz”, inmaneade de Biblioteche pe Afriche-Time for Africa, che e à jemplât tal mês di Jugn il toc di strade sot dai arbui. Po dopo la fieste e va indevant cul DJ Maurizio Zilli e un ghiringhel metût adun in gracie dal supuart e de colaborazion dal Tommy Bar. (A.I.) – 29.06.2026