“Feminis furlanis fuartis”, storiis dal dì di vuê

Storiis di feminis furlanis dal dì di vuê, impegnadis inte vite economiche, sociâl e culturâl, leadis de “fuarce” pandude intal mût che a àn perseguît la proprie realizazion. Lis unissin la braùre pes lidrîs e il leam cu la proprie tiere, un pont fer di dulà partî e dulà tornâ, ancje cuant che l’orizont dal lôr lavôr e dal impegn al devente il mont. Publicadis sul storic mensîl “La Patrie dal Friûl” dal 2020 a vuê, a son racueltis cumò intal libri “Feminis furlanis fuartis” di Erika Adami, gjornaliste professioniste cuntune lungje esperience di comunicazion in lenghe furlane.  Il volum – il sest de golaine “La machine dal timp”, dut par furlan – al sarà presentât miercus ai 13 aes 6 sore sere intal Salon dal Consei di Palaç Belgrât a Udin. La publicazion e valorize storiis che a vegnin fûr di râr, di grande ispirazion pal mût che lis lôr protagonistis a àn savût realizâsi, inte vite personâl e professionâl, intai cjamps plui diviers. (A.I.) – 12.12.2023