Esplorando, une esperience ‘verde’ pes fameis

Daspò dal grant sucès de prime edizion, al torne “Esplorando”, il percors educatîf promovût de stesse associazion culturâl. Il fin de rassegne, che e previôt 24 ativitâts in 17 lûcs de Regjon, al è chel di fâ vivi ai fruts e a lis fameis un (o plui di un) percors e une esperience a contat cu la nature – tai parcs, tai boscs e in altris zonis verdis – par coltivâ il rispiet pai ambients naturâi, stiçâ la creativitât e la curiositât par dut chel che al è ator di noaltris e nudrî il plasè di stâ tal viert. Ogni incuintri al tache cuntune leture e al à une schirie di postazions di esplorâ doprant ducj i sens, un laboratori cun esperts, un spazi pai libris dedicâts al viert e, par sierâ, un ghiringhel ducj adun. Joibe ai 5, apontament a S. Zuan dal Nadison e il dì dopo a Gardiscje. (A.I.) – 03.07.2024