Esam par furlan, la ARLEF lu premie

“Pal impegn dimostrât inte valorizazion de lenghe furlane”. Cun chestis peraulis suntune targhe, la ARLeF – Agjenzie regjonâl pe lenghe furlane e à volût ricognossi la sô stime a Pietro Mangiacapra: zovin di Glaunic di Cjamin dal Tiliment, student de scuele secondarie di prin grât “G. Bianchi” di Codroip, za “sindic dai zovins” de citât, che di pôc, pai esams di tierce medie, al à sielt di scomençâ il colocui in lenghe furlane e di lâ indenant par todesc. La consegne e je stade fate cu la presince dal president de ARLeF, Eros Cisilino e dal diretôr de Agjenzie, William Cisilino. Cun lôr ancje i gjenitôrs dal fantat, la dirigjente dal Istitût Comprensîf di Codroip, Erminia Salvador, la vicjarie e ambassadore Erasmus intal Friûl-Vignesie Julie, Lucia Schilter, e il professôr Alberto Travain che al è stât l’insegnant di Pietro pes materiis umanistichis (talian, storie e gjeografie) ma ancje pal cors di oratorie furlane. «Al è un ricognossiment che al ricuarde che la lenghe furlane e je vive e e cres intes nestris scuelis ancje in graciis dai zovins che a sielzin di cjapâle sù in maniere convinte, cemût che al à fat Pietro – al à marcât il president de ARLeF, Eros Cisilino -. Il so percors al dimostre che il furlan nol è dome ereditât des fameis, ma ancje une sielte cussiente che e à cjatât supuarts impuartants inte direzion scolastiche e intai docents, che o ringraciìn. Pietro al è par sigûr un esempli concret di cemût che il furlan al pues jessi un element di conession, ancje pal fat di jessi stât il prin sindic dal consei comunâl dai zovins a esprimisi in lenghe furlane, e de proiezion positive bande l’avignî pal nestri teritori». Il zovin di fat al ven di une famee là che no si fevele furlan, la sô e je duncje une sielte che e à ancjemò plui valôr. «Volê tacâ il colocui dal esam di tierce medie par furlan e lâ indenant par todesc e je stade une sielte semplice, ma siore di significât, che e conte cemût che si puedi protezi lis propris lidrîs e, tal stes timp, vierzisi ae Europe e al avignî, dimostrant che identitât e inovazion no son in contrast, ma a puedin cressi a pâr. Chest al è il messaç plui biel che chest fantat al mande a dute la comunitât scolastiche. O soi content pe maturitât e cussience che a son daûr di cheste sielte, esempli vêr di cemût che lis gnovis gjenerazions a puedin deventâ protagonistis de tutele e de valorizazion dal nestri patrimoni linguistic. Un risultât che al ven ancje dal lavôr preziôs dal professôr Travain», e à rimarcât la dirigjente dal Istitût Comprensîf di Codroip, Erminia Salvador. «Pietro al è une persone di peraule, che al puarte insom i impegns cjapâts e cuntun grant spirt critic – al à precisât il professôr Alberto Travain –. Al è une “moscje blancje”, tal sens plui positîf di cheste espression. Al à disvilupât un sens identitari no comun vuê, che al esprim ancje pe sô precision intal studiâ la oratorie furlane in chescj agns. Il so assum e la sô sielte a àn un valôr civic e culturâl plui impuartant che no lis competencis linguistichis rudis, dimostrazion che il furlan al è tradizion dal teritori che e cree comunitât. In lui o viôt une grande determinazion che i tornarà utile te vite in ducj i cjamps. O sin braurôs dal so percors e i augurìn che cheste atenzion ai aspiets identitaris e puedi compagnâlu simpri». Cjalant lis tapis plui impuartantis dal so percors cu la lenghe furlane, il professôr al à ricuardât cemût che, intant dal so mandât di “sindic dai zovins” di Codroip, – incarghe che al à puartade indenant cun responsabilitât e che al à tornât a vê in proroghe – Pietro si sedi fat cognossi par vê cjapât a cûr il rûl istituzionâl e par ve savût rapresentâ la comunitât ancje midiant de lenghe furlane, rivant a doprâle in contescj uficiâi. Al è stât, di fat, l’unic a fevelâ par furlan intun incuintri inmaneât de ACLiF e il prin student che al à doprât la lenghe furlane intun esam di tierce medie («un primât storic»). No dome: tal so percors formatîf, ancje dentri dal cors di oratorie furlane dal prof. Travain, si è fat notâ pe capacitât di argomentâ, rivant a sostignî par plui di une ore un confront su la politiche europeane. (R.V.) – 22.07.2026