Dusinte ospits a Udin par “vicino/lontano”

Al è “scart” la peraule clâf de vincjesime edizion dal festival “vicino/lontano”, in program a Udin di miercus ai 7 a domenie ai 11 di Mai, cun avigniments di anteprime za tacant dai 22 di Avrîl. Plui di 100 i apontaments in program, tra confronts, incuintris, mostris, spetacui e proiezions, cun tant che ospits passe 200 personalitâts dal mont des siencis, de leterature, de art, dal spetacul e de informazion, par continuâ a resonâ insiemi, frontant tematichis di atualitât urgjente. Tantis lis presincis de edizion 2025 presentadis a Udin dai organizadôrs, di Francesca Mannocchi a Lucio Caracciolo, Helena Janeczek, Daniel Schulz… La serade dal Premi “Terzani” – in program sabide ai 10 di Mai tal Teatri Gnûf “Giovanni da Udine” – e sarà, compagn di ogni an, il moment plui spietât dal festival. Il Premi, anunziât la setemane passade de presidente de jurie, Angela Terzani, al è stât chest an dedicât ae memorie dai gjornaliscj e des gjornalistis di Gaza. A saran a Udin a cjapâ in maniere simboliche il Premi, a non dai tancj coleghis copâts dilunc de vuere, Wael al-Dahdouh e Safwat al-Kahlout, ducj i doi gjornaliscj de emitent Al Jazeera. (A.I.) – 15.04.2025