Ducj letôrs cuntun “libri che al dure un dì”

Il Friûl-Vignesie Julie no je dome che une regjon che e poie lis iniziativis tant che “LeggiAMO 0-18 FVG”, un progjet di promozion de leture pai plui zovins, rivât ae diesime edizion. Adun cun chest progjet e je nassude e cressude la zornade regjonâl de leture, che e je stade la prime in Italie e che si clame “Un libro lungo un giorno”, Un libri che al dure un dì. Une maratone in calendari ogni ultin vinars dal mês di Otubar. Une place vierte e difondude di libris e di letôrs, che vinars ai 31 e propon come simpri cualchi centenâr di events ator pal teritori, publics e privâts, di buinore fint ae sere. Ducj a son invidâts a partecipâ cuntune leture fate là che si vûl. Autôrs e autoris di chenti e talians a son devntâts “ambassadôrs de leture”, contant tai lôr video parcè che lei al fâs ben: Federica Manzon, Andrea Maggi, Gian Mario Villalta, Mary Barbara Tolusso, Alberto Garlini, Antonella Sbuelz, Enrico Galiano, Tullio Avoledo, Andrea Segrè, Odette Copat, Francesco De Filippo e ducj i volontaris di pordenonelegge. Tal stes dì, e sarà fate une grande fieste pai 50 agns de Pimpa di Altan e si screarà la mostre “Leggiamo”, cui ritrats di chei che a àn za partecipât, ancje il Consei regjonâl, ognidun cul so libri plui preseât! (A.I.) – 30.10.2025