Dôs citâts, trê mostris: si siere l’omaç a Ado Furlan

Ultins dîs par cognossi miôr la figure e la ativitât di Ado Furlan, il scultôr di Pordenon che al à segnât il Nûfcent furlan, e no dome chel, cul omaç pensât pai 120 agns de nassite dal artist de bande de fondazion che e à il so non. Trê lis mostris viertis cul stes titul, “1905-2025 Ado Furlan”, a Pordenon e a Spilimberc. A Cjase Furlan fint a sabide ai 15 al è pussibil visitâ une dople esposizion: une dedicade al scultôr e “ai amîs di Nord-est” e chê altre, “Une famee, une cjase, une strade”, che e conte sedi la famee dal artist che la storie de strade là che al jere a stâ. A Spilimberc invezit si siere domenie ai 17 la mostre cu lis ultimis sculturis inmaneade tal palaç Tadea, cu la sieradure in musiche fate dal pianist Alessandro Del Gobbo. Tal stes lûc, fint a domenie, si pues visitâ ancje la mostre permanente dedicade ae sculture taliane dal Votcent al Doi mil, cun oparis dal stes Furlan. (A.I.) – 14.11.2025