Doi mestris a confront a Gardiscje

E vierç vinars ai 16 a Gardiscje, ae Galarie regjonâl di art contemporanie “Luigi Spazzapan”, la mostre “Sottsass/Spazzapan”, in program fintremai ai 30 di Avrîl dal 2023. La esposizion curade di Lorenzo Michelli e Vanja Strukelj e je dedicade al rapuart tra l’artist di divignince slovene e l’innomenât pitôr e architet trentin Ettore Sottsass. Doi mestris cetant diferents par origjin, formazion, destin, ma che si son cjatâts a Turin intai Agns ‘30. La mostre, in graciis dal prestit di plui o mancul 120 oparis dal font Sottsass, conservât ae Universitât di Parma, e met in lûs incrosaduris e distancis tra i percors dai doi artiscj, ancje cun gnûfs tocs di Spazzapan. (A.I.) – 15.12.2022