Un gnûf moment di aprofondiment e confront pai studiôs e i apassionâts de opare di Pier Paolo Pasolini: la cunvigne internazionâl “Pasolini America”, in program ai 7 e ai 8 di Fevrâr inte sale consiliâr di Palaç Burovich a Cjasarse. Organizât dal Centri studis Pier Paolo Pasolini, l’avigniment al rapresente une ocasion inedite par indagâ il rapuart complès e multiformi tra l’inteletuâl furlan e il continent american e cjapâ dentri chel dialic complès intune epoche di grancj cambiaments e contradizions. La cunvigne e darà acet a relatôrs di innomine internazionâl, che a vegnin di istituzions academichis di Stâts Unîts, Russie, France, Spagne, Irlande e Italie par esplorâ lis molteplicis influencis, sugjestions e interazions jenfri Pasolini e la culture statunitense traviers storie, leterature, cine e art. (A.I.) – 06.02.2025
Foto di D. Pallottelli
