Dissens sacris par un “centenari”

Il teme de Via crucis e la figure dal Crist a son i elements al centri des mostris che a son daûr a vierzi te suaze de trentesime cuarte edizion dal Festival internazionâl di musiche sacre, dedicât chest an ae “fede”: la ispirazion no dome par un program di musichis, ma ancje dai percors espositîfs metûts dongje, tacant dal omaç al pitôr Renzo Tubaro. Nassût a Codroip cent agns indaûr, protagonist ae “Cuadrienâl” di Rome, autôr di afrescs in cetantis glesiis furlanis, al à vût un rapuart special cu la tradizion di autôrs venits, al à piturât ritrats, paisaçs e naturis muartis, plui visions che realtâts. Par celebrâ la sô art e rive la mostre “Figure del sacro nel disegno di Renzo Tubaro”: un percors fat di trente oparis, mai viodudis prime, par cure dal critic Giancarlo Pauletto, promovût de associazion Centro Iniziative Culturali di Pordenon tal centri culturâl Aldo Moro di Cordenons. La mostre si scree sabide ai 6 e si podarà visitâ fint ai 27 di Setembar. Simpri atent ai disvilupâ de art taliane tal secont daspò vuere, Tubaro al fo preseât di critics e inteletuâi tant che Pier Paolo Pasolini e Carlo Sgorlon. La mostre di Cordenons e je une anticipazion de grande antologjiche che si fasarà in curt a Vile Manin di Passarian, là che tal 1997 e fo dedicade une mostre al Tubaro autôr di afrescs. (A.I.) – 05.09.2025