Diferents, ma compagns pe sience

Trê dîs di incuintris, conferencis, laboratoris e spetacui ator pe citât di Udin, dai 23 ai 25 di Mai, pe gnove edizion de rassegne “DiverSimili”, promovude de associazion Kaleidoscienza, che e conte la diversitât tant che valôr ae fonde di nature e umanitât. Instreçant lis lenghis de sience, de art e dal spetacul. La rassegne si vierzarà te sede de associazion, in Via Brigata Re, cul zûc interatîf “Libris in taule”, ideât par mudâ la idee de chimiche tant che une materie noiose. Tal stes dîs si scree “Sbilfs”, une opare di art interative ispirade ai folets de tradizion cjargnel, fate di Kaleidoscienza cuntun grup di frutis e fruts. Sabide ai 24 si messedin ancjemò la divulgazion sientifiche e il divertiment cul spetacul “Il Quizzone scientifico”, e po dopo il spetacul di danze contemporanie “Oz” de compagnie Arearea, il radiodrame di SPK – Teatro “Il Giardino” e la musiche eletroniche dal DJ Railster. Tal stes dì, in ocasion de Zornade mondiâl dal zuc, chei di Kaleidoscienza a saran ancje in centri, in vie Cavour. E domenie ai 25, un spetacul e laboratori sul ricicli creatîf pai plui piçui e il spetacul “Botanica Queer”, par cure di Nina’s Drag Queens, che al met dongje la diversitât dai vegjetâi e lis identitâts ‘fluidis’. (A.I.) – 22.05.2025