“Dedica”: la leterature e torne sul palc di sene

Lis anteprimis dal festival “Dedica” a tornin sui palcs di sene de regjon pal Istât, invidant il public a riscuvierzi il valôr de grande leterature midiant dal lengaç dal teatri, de musiche e de narazion des storiis. Trê i apontaments, ducj a jentrade libare cence sore nuie, dedicâts al ospit dal festival tal Març passât a Pordenon, il scritôr Sorj Chalandon, che a compagnaran i spetatôrs di Jugn al mês di Avost. Il prin al è in program par martars ai 23 di Jugn aes 9 sot sere tal curtîl dal Cjistiel di S. Vît dal Tiliment. Sul palc e sarà fate une leture seniche dal romanç “Chiederò perdono ai sogni” di Sorj Chalandon, interpretade dal ator Massimo Somaglino compagnât des musichis di Mirko Cisilino. Il viaç al larà indevant martars ai 28 di Lui a Fontanafrede cun “Blues di Franti”, scrit e contât di Angelo Floramo, e si sierarà in Avost a Privan, tal comun di Bagnarie” cun “Una gioia feroce” di e cun Carlotta Del Bianco. (A.I.) – 22.06.2026