“Dedica”, in vore la rassegne par un grant de leterature mondiâl

Peraulis, musiche e sene si instrecin tun percors tacât cui vincj dîs di “anteprime” dal festival in undis comuns de regjon in ancjetancj apontaments a jentrade libare. Ducj inmaneâts par svicinâsi ae edizion 2026 di “Dedica”, la rassegne inmaneade di 32 agns de associazion culturâl Thesis di Pordenon. Un apontament unic in dute Italie, stant che e je propit une “dediche” cetant largje a un grant autôr de leterature mondiâl. Chest an, al è il francês Sorj Chalandon, une des vôs plui fuartis de narative francese contemporanie, scritôr, gjornalist e testemoni des vueris plui tremendis de seconde metât dal nûfcent, bon di traviersâ cu la sô scriture lis feridis de Storie. Fint 14 ai 21 di Març, a Pordenon si fevelarà di ducj chei lûcs che Chalandon al à contât tai siei romançs, a tacâ de Irlande dal Nord. E di un Mont fat di violence, injustizie. Tal program metût adun dal curadôr – dentri di chê bande ‘scure’ dal om che no je mai lade vie pardabon! – daspò de scree di sabide ai 14, la presentazion di une monografie cuntun test di Federica Manzon, che e presentarà ancje altris events. E po dopo, lunis 16 sot sere teatri cun Gabriele Vacis e, tai dîs che a vegnin, un predi e un rapper a confrontâsi, i cines par cure di Cinemazero, un pâr di mostris e il conciert dal irlandês Dave Finnegan. (A.I.) – 16.03.2026