Davâr: jenfri memorie e avignì

Miercus al Prin di Avrîl, aes 5 e mieze di dopomisdì, tal Centri socioculturâl dal paîs si presentin i risultâts dal progjet “Davâr storie tracce materia” (Storiis, olmis, materie), cuntune conference, une mostre e un spetacul. Si tache cu la scree de mostre dedicade al progjet “Sui trois de storie e de materie: paîs e museus pe rigjenerazion culturâl de mont”, finanziade dal Plan Nazionâl di Recupar e Resilience (PNRR), cu la presentazion dai risultâts principâi intune conference. Aes 8 e mieze sot sere e sarà presentade la leture seniche “Anche il buio è un colore, Ancje il scûr al è un colôr, di e cun Carlo Tolazzi. Il dramaturc al à adatât la storie di esperiencis veris tal paîs minerari di Cludini, un dai 13 borcs di Davâr. Cun Federico Galvani ae armoniche, Tolazzi al à metût su un test cui ricuarts dai minadôrs, presints te frazion dal paîs par doi secui, fint al 1960, tai cuasi 150 chilometris di galariis dulà che al jere – e al è ancjemò – il carbon. (A.I.) – 31.03.2026