Cun Ulderica Da Pozzo dentri de preson

Tal Cjistiel di Udin fint ai 31 di Mai, la fotografe cjargnele Ulderica Da Pozzo – une professioniste che e lavore aromai di cuasi 50 agns – e presente la sô gnove mostre tal Museu furlan de fotografie. “I giorni strappati” (I dîs sbregâts) al è un progjet nassût tal 2021 te preson di Udin, dentri de ex sezion feminine di vie Spalato, cambiade dal dut daspò di une ristruturazion di spazis bandonâts di agnorums. La fotografe e je jentrade pe prime volte tes celis cinc agns indaûr par documentâ il “timp vueit” di spazis plens di memorie e al principi dal 2026 par contâ i cambiaments, ma ancje i sintiments. (A.I.) – 16.03.2026