Cui arbui in vore pal ambient a Buri

Di sîs edizions, al instrece art, sience, spetacul, divulgazion e partecipazion civîl ator dal teme de centralitât dai arbui e di dutis lis plantis pe sorevivence dal planet, soredut des citâts. Tai spazis de vile Di Toppo Florio e dal so parc a Buri, ancje chest an al torne il “TreeArt Festival”; une rassegne culturâl dedicade propit ai arbui, no dome un element naturâl, ma une metafore di vite sociâl condividude e sostignibil, daûr de curadore dal progjet Patrizia Minen, che e à inventât un strument par promovi il teritori e l’ambient dal paîs. Promovût de associazion culturâl cul stes non, vuidade di Fabio Salbitano, tal comitât sientific adun cul espert Pietro Maroè, il festival al previôt incuintris, mostris, laboratoris, musiche, conferencis e intervents di art ator dal teme di chest an: “Conessions”. A vierzi il program joibe ai 10 a saran lis taulis di lavôr par esperts e citadins, clamâts a butà jù un document sul ambient pai agns che a vegnin. Vinars ai 11 la scree, cu la poie di une gnove opare di art (in marmul) di Selene Frosini tal parc, aromai un museu tal viert. Po dopo, ducj i ospits tacant dal atôr Giobbe Covatta, impegnât a nivel sociâl e ambientâl, i spetacui di Sara Ariotti, Alice Bossi e Ventaglio d’arpe, la artiste e ricercjadore Laura Cinti, e cetancj altris testemonis di buinis pratichis di recupar e protezion dal ambient. (A.I.) – 09.07.2025